進入劇本後（上）
「豬排，你仲係暗戀緊Tony啊？我勸你都係死心啦。」
呢句說話好熟悉，喺邊度聽過呢？
我忍唔住望向旁邊嗰塊鏡，鏡中果然有一個好醜樣嘅女仔。
唉，我終於知道發生咩事啦。
我係一個編劇，參與咗幾套劇嘅製作，都幾受歡迎。
但係，我已經受夠嗰種美好到虛假嘅劇情。
點解一個普普通通嘅女人，會被跨國總裁愛上？
點解一無是處嘅主角，只憑住好運，就可以登上人生巔峰？
我唔想再寫呢種劇，我想寫更真實嘅故事，有血有肉，先有深度。
於是，我寫咗一個關於醜女嘅故仔。
其貌不揚嘅女主角讀大學嗰陣，暗戀靚仔男主角Tony，但Tony眼中，永遠只有外型吸引嘅靚女。
無論女主角幾體貼幾善良，Tony始終當佢係朋友。
女主角好唔開心，糾結咗一輪，佢決定去整容。
大家係咪以為，佢會整容成功，得到Tony嘅愛，幸福快樂咁生活落去？
不不不，每日都有人去整容，但邊有咁多人心想事成。
女主角整咗容，佢個鼻高咗、塊臉瘦咗，但佢都係唔靚。
女主角以為係自己整得唔夠，不惜借錢接受更多整容手術，但效果愈嚟愈差。
佢終於意識到，唔係所有人整完容，都可以變靚。
男主角冇愛上佢，佢更因為整容而負債累累，過住充滿壓力嘅生活。
上司睇咗呢個劇本，皺晒眉頭，問我做咩寫埋啲咁嘅嘢。
我就解釋，我傳遞緊正面嘅價值觀，我哋唔鼓勵盲目整容，應該發展自己嘅長處……
上司搖搖頭：「邊有人睇㗎？」
我拎住劇本，垂頭喪氣，暗暗責怪上司唔識欣賞。
點知返到屋企，瞓著咗之後，我就穿越咗落呢個劇本中，成為女主角。
我同自己講，冇嘢嘅，雖然醜樣啲，但我現實中都唔係靚女，咪一樣過得幾好。
我早就諗過，點樣改變女主角嘅命運。
我唔會追住Tony轉，更唔會借錢整容，我要發展自己嘅事業，到時再搵一個真正識欣賞我嘅伴侶。
我返到宿舍，開電腦搜索資料，諗緊點樣增值自己。
但夜晚七點鐘，我突然好似鬼上身一樣，不由自主地行去餐廳。
冇錯，劇本有寫過，女主角會儘量喺Tony食飯嘅時候，去餐廳食飯，希望可以望多佢幾眼。
我依加唔想去啊！但我控制唔到自己嘅身體。
我意識到一個悲慘嘅現實：我無法改變劇本。
喺劇本冇寫嘅地方，我都可以控制自己，例如劇本唔會寫女主角幾點刷牙，咁我唔刷牙都冇問題。
一旦劇本有寫，我只可以照住劇本做。
換句話講，我根本改變唔到命運。
跟住落嚟嘅劇情，一如劇本般悲慘，我不由自主地去咗整容，承受劇痛，欠下債務。
我仲慘過女主角，女主角整容嗰陣，係幻想自己會變靚、會收獲愛情，佢滿懷希望，令佢可以捱過呢種痛苦。
而我就好清楚，等待我嘅係更悲慘嘅命運，身痛，心更痛。
下集：https://bit.ly/2YfAkF0
將專頁設定為「搶先看」/ "See first"，最新故仔馬上睇！
分手填問卷：https://goo.gl/kazZRc
坐監之後：http://bit.do/e8MuY
#短故 #短篇 #小說 #陳美濤 #廣東話 #粵語 #tomatochan #進入劇本後
Search